انا خاطب من 6شهور
"انا خاطب من 6 شهور وبحب خطيبتى جداً وقريب هنتجوز ، من حوالى شهر جالى مسج ع الفيس من أكونت Fake فيها صورة لخطيبتى بشعرها ولابسه بيچامة بيت ضيقة ومكشوفة ، طبعاً اول ما شوفت الصورة كنت هتجنن وثورت ومكنتش عارف افكر ، مسكت الفون كنت هكلمها ، لكن الحمدلله تراجعت ع اخر لحظة ، هديت وحاولت افكر بعقلى ، ولما فكرت لقيت انه اكيد اللى بعتلى الصورة دى حاجة من الاتنين يأما واحدة صاحبتها منفسنة منها ، او واحد حاطط عينه عليها ، وف الحالتين اللى بعتلى الصورة قاصد انه يعمل بينا مشاكل ونفسخ الخطوبة ....
كلمتها وقولتلها انى عايزة اشوفها ، رحت قابلتها وجبتلها معايا ورد ، وكلمتها براحة خالص ورتلها الصورة ، طبعاً اتكسفت واتوترت وبدأت ټعيط ، هديتها خالص وطمنتها ، وقولتلها اهدى انتى وانا هتصرف ووعد منى انا هحلها و هردلك كرامتك من اللى عمل كده ، مشينا ، واول ما روحت البيت نزلت بوست بمدحها فيه وبقول انها احلى حاجة ف حياتى ، اولاً عشان اديها ثقة ف نفسها وأكدلها ان اللى حصل ده مغيرش اى حاجة ، ثانياً عشان أبين للشخص اللى عمل كده ان خطته فشلت ، فيبدأ يتصرف تصرفات مش محسوبة ، فيغلط ويتقفش ، وده بالفعل اللى حصل ، الصورة دى كانت ع موبايل خطيبتى ، متصوراها ف البيت عادى بلبس البيت زيها زى اى بنت بتحب تتصور بهدوم البيت وبشعرها ، و اكتشفنا ان واحدة صاحبتها خدت الصورة من ع موبايلها وبعتتهالى عشان توقع بينا لانها غيرانة منها ، طبعاً اتصرفت ف الموضوع وردتلها كرامتها زى ما وعدتها ، واول مقابلة لينا بعد ما الحوار اتحل ، جبتلها لاب توب ، وقولتلها .. مش هقدر طبعا اقولك متتصوريش واخنقك واقيد حريتك ، اتصورى براحتك خالص ، بس طالب منك طلب صغير ، بعد ما تتصورى انقلى كل الصور ع اللاب وامسحيهم من ع الفون خالص ، عشان الفون ممكن يضيع او يتسرق او غيره ،،،،
علق بشيء تؤجر عليه ليصلك كل جديد
