رواية مفسدي حياتها كامله جميع الاجزاء بقلم امل صالح
تشوفوا البيت اتفضلوا قوموا شوفوه معنديش مشكلة بس من غير أذية مش لازم تسيبوا بصمتكم في كل حتة!
شاورت على الأوضة اللي سابت فيها مسك_ عايزة تشوفي حفيدتك حقك وعلى عيني ليك تشوفيها وقت ما تحبي وفين ما تحبي بس برضو بالهداوة بالحب واللين..
بصت لرشا وسالتها_ جربتي تحبيني قبل كدا يا طنط جربتي تعامليني كويس وتقولي يلا عشان ابني وخلاص..
بصت لسمية_ وأنت يا سمية فاكرة كنا إزاي أنا وأنت فاكرة لما كانوا يشوفونا سوا يفكرونا اخوات فجأة كدا بقيت بتكرهيني ومش طايقاني فجأة كدا بقيت وحشة..
وقفت وشاورت على المكان_ البيت بيتكم يا جماعة البيت بيتكم.
دخلت الأوضة وقفلت الباب وراها بهدوء مرضتش ترزعه عشان متعملش مشاكل تاني رغم رغبتها القوية في رزع خمسين باب.
كان قاعد جوة العربية ساند دماغه لورا ومغمض عيونه وهو بيحاول يرتب أفكاره افتكر كلامه لامه وأخته قبل ما ينزل وكلامه لزينب أم هاجر ومشيها بزعل من المكان.
نفخ بضيق وهو بيدور العربية عشان يرجع ولكن بدل ما يرجع البيت قرر يروح بيت حماته وحماه يتأسف منها الأول عن أسلوبه وطريقة كلامه.
خبط على الباب
فتحله خالد اللي رحب بيه_ تعالى يا إسلام تعالى.
حط إيده في راسه بإحراج وهو بيسأله_ الحجة صاحية ولا اجيلها بكرة
دخل إسلام وقعد في الأنتريه بإنتظار خروجها ومعاه قاعد خالد كان مشبك ايديه سوا وأول ما خرجت وقف على طول شاورتله زينب عشان يقعد تاني_ اقعد يابني اقعد.
معلش لو كنت صحيتك.
لا ولا صحيتني ولا حاجة دانا يدوب كنت لسة هجهز لقمك أكلها.
لفت وشها الناحية التانية وهي بتنادي_ شهد ... بت يا شهد قومي اعملي كوبايتين شاي.
اخد نفس وكمل_ مش عايزك تزعلي مني أنا بس كنت متعصب شوية لما عرفت منهم اللي حصل وڠصب عني قولت اللي قولته حقك عليا متزعليش.
ابتسمت وهي بتبطبطب على رجله_ لأ مش زعلانة ولا حاجة أنت عندي بمقام الواد خالد ومحدش بيزعل من ابنه برضو!
خرج من عند زينب بنفس راضية بعد اعتذارها ورضاها عنه رجع البيت على طول بعد ما كلم غنيم أبوه وعرف منه إن أمه وسمية لسة مرجعوش كان طول الطريق متوتر يكون حصل حاجة تاني مع هاجر ومعاهم.
وصل ونزل من العربية بسرعة ومنها دخل البيت فتح الباب بهدوء اتفاجئ بأمه قاعدة على الكنبة وجنبها سمية ساندة على كتفها ونايمة!!
أنتوا لسة هنا!
هنقوم نمشي أهو حاضر.
نفى براسه بسرعة_ لأ يا حجة مش قصدي خدي راحتك..
بص للمكان حواليه بقلق_ فين هاجر
شاورت على الباب بإيدها اتحرك عشان يدخل يطمن عليها فوقفته رشا_ متقلقش محدش فينا عملها حاجة.
لف بصلها فكملت وهي بتزق سمية_ أنا هكلم أبوك يجي ياخدنا وأنا هروح البيت وقت ما تحب تشوفني هتلاقيني قاعدة هناك وأنا لما احب أشوف بنتك هجيلها..
بصت حواليها_ البيت حلو ربنا يجمعكم فيه على خير.
مسك مفتاحه_ أنا هوصلكم وأرجع تاني..
ملوش لزوم.
ميصحش يا ماما يلا أنت مخلفة راجل!
سبقهم لبرة عشان يفتح العربية وهم ثواني وكانوا برة كانوا طول الطريق ساكتين هو بيحاول يقول اي حاجة عشان يعتذر عن اللي حصل.
وصل ووقف العربية لف بص لأمه اللي كانت قاعدة جنبه_ أنا عايز اعتذرلكم عن اللي حصل وعن اللي قولته بس مش معنى كدا إنكم مش غلطانين أنا هسيبكم لنفسكم وكل واحد أدرى بنفسه.
نزلوا
وهو لف ورجع
وبرغم إن موجهش أي كلام لهاجر في القاعدة إلا إنه حاسس إن الإعتذار اللي بجد لازم يكون ليها هي!
يتبع....
مفسدي_حياتها
بقلم_أمل_صالح
لا أستحل أخذ قصصي حتى ولو كان اسمي موجود مش مسامحة أي شخص بينشرها وياخد ريتش على حسابي
العاشر
وبرغم إن موجهش أي كلام لهاجر في القاعدة إلا إنه حاسس إن الإعتذار اللي بجد لازم يكون ليها هي!
وصل البيت اللي كان هادي جدا فكر إنها نايمة ففتح الباب براحة عشان متصحاش هي ومسك لكنه اتفاجئ بيهم الاتنين صاحيين!
كانت هاجر حاطة مسك قصادها على السرير وبتلاعبها وهي بتغني ليها_
بابا جاي امتى
جاي الساعة ستة
راكب ولا ماشي
راكب بسكلتة
حمرا ولا بيضا
بيضا زي القشطة!
إبتسم وهو بيقفل الباب ويدخل وقفت هاجر بسرعة وقربت منه_ إسلام!
إبتسملها وهو بيقعد على السرير قصاد مسك_ ايه اللي مصحيكوا لسة
هنام إزاي وأنت برة كنت فين كل ده إزاي أصلا تطلع من البيت كدا ولا بترد عليا ولا على مكالماتي حرام عليك يا إسلام!
طب واحدة واحدة طيب آخد نفسي!
بصتله بدون ما تتكلم فشاور جنبه_ تعالي اقعدي هنا هتفضلي واقفة كدا ولا ايه!!
قعدت على كرسي التسريحة وهي لسة بتبصله بصمت وهي مربعة إيدها بإنتظار يحكيلها بص إسلام للمكان حواليه بإعجاب_ ما شاء الله أنتوا خلصتوا البيت ولا ايه الترتيب جميل.
آه خلصنا وأنت برة في الشغل خالد ركب العفش وأنا وماما وشهد رتبنا الهدوم وفرشنا المكان.
طب والله عاش.
إسلام!
ضحك وهو بيقف من مكانه_ خلاص خلاص متتعصبيش.
شد كرسي وقعد قصادها وبدأ كلامه بتنهيدة_ مكنتش في مكان معين خدت العربية وفضلت ماشي بيها وأنت عارفة بقى أرض الله واسعة ركنت في حتة هادية وفضلت قاعد فيها دماغي عمالة تسوحني كدهو زي ما أنت فاهمة..
اخد نفس قبل ما يكمل_ روحت لطنط زينب قعدت معاها شوية ورجعت هنا لقيت أمي وسمية روحتهم ولسة جاي تاني أهو.
بصتله بلوم وعيون مدمعة_ كنت رد عليا يا إسلام رد عرفني أنت فين ولا بتعمل ايه دانا رنيت عليك فوق ال٥٠ مرة ماهانش عليك ترد عليا.!
مسك إيدها وطبطب عليها_ معلش حقك عليا أنت عارفة أنا لما بتعصب كدا بحب أفضل لوحدي لحد ما أهدى أحسن ما أطلعهم عليك ياعم!
قال آخر جملة بهزار بصلها لقاها زي ما هي مابتسمتش حتى ضغط على إيدها اللي بين ايديه_ خلاص بقى اضحكي ياستي مستخسرة فيا الضحكة
أنا بجد زعلانة والله!
معلش حقك أنا عارف المهم...
بصتله فكمل_ حصل حاجة بعد ما مشيت هنا ماما وسمية يعني.
اخدت نفس وجاوبته_ لأ محصلش حاجة مهمة هم قالولك حاجة
نفى براسه_ لأ مقالوش حاجة جيت لقيتهم لسة قاعدين.
وقفت_ طيب قوم لو هتاخد دش على ما أجهز الأكل أنا عارفة إنك مش بتاكل في الشغل عشان مبتحب...
قطعت كلامها لما لقت وهو بيتكلم بنبرة هادية وصوت حنين_ متزعليش يا هاجر حقك على قلبي وعيني مش عايزك تكوني زعلانة..
ابتسمت
