روايه حصري

وعددهم بيزيد يوم عن يوم!
مكنتش متخيلة إنها هتنجح في يوم من الأيام ولا إن يكون ده تفكيري بدأت أدرك وجود الصحبة الصالحة مع الشخص وجودهم بيفرق وبيخلينا نروح لأماكن بعيدة خالص!!
القرار مكنش سهل كنت بحس كتير بحنين لحياتي العشوائية وللهلس لليوم اللي بلا هدف لحظات اليأس مكنتش قليلة بس كان منظر البلورة بيظهر قدام عيني دايما الورقة مكنتش بتغيب عن بالي أبدا برغم التطور اللي حصلي أنا لسه معرفتش إيه هي البلورة بتاعتي ولا قدرت أشد شلتي معايا!
_جايلك عريس.
أوحش كلمة على قلبي.
قولوله معندناش بنات للجواز.
_ولحد إمتا هتفضلي ترفضي من برا كده!

لحد ما أحس إن ده الشخص المناسب.
_وهتعرفي منين إنه الشخص المناسب من غير ما تشوفيه
بالإحساس هحس.
_رهف أنا مش هعيشلك العمر كله إنتي لازم تفوقي شوية لمستقبلك.
ماما أنا خاېفة خاېفة بعد ما قطعت الطريق ده كله وبدأ مخي يكبر أخد حد تافه مش شبهي.
_وليه حكمتي عليهم كلهم إنهم كده إدي نفسك فرصة.
المرة دي حسيت إن عاوزة أخد رأى الكوتش وجود أصحابنا حلو بس أوقات بنحتاج ناخد رأى حد أكبر مننا حد ناضج وفاهم الدنيا صح أكتر من مجرد صديق لأن الأصحاب ممكن يكونوا دماغهم شبهنا ممكن مينفعوناش في إننا ناخد القرار الصح أوي بالعكس أوقات بيحصل العكس مش شرط يكونوا وحشين بس نظرتنا بتكون سطحية شوية أو أرائنا شبه بعض بنكون محتاجين حد يوجهنا للصح بغض النظر عن المشاعر العقل وبس!
العقل أوقات بيكون هو المنقذ لينا في المواقف الصعبة حسبة العقل بتكسب أكتر من القلب..
_وإنتي خاېفة ليه
مش عارفة متوترة قلقانة.
_أنا فاهمة دماغك يا رهف إنتي خاېفة خاېفة من التجربة بس لو فكرنا بالعقل هتلاقي إنك كده مبتحسبيهاش بالعقل وماشية ورا هواكي وإحنا إتفقنا إن ده غلط صح
مش حاسة إن سهل ألاقي حد شبهي وأنا أصلا عاوزة حد يكون أنجح مني حد يشدني هو لطريق النجاح حد يساعدني على تطوير ذاتي مش يوقعني ويضيعلي الطريق اللي تعبت فيه.
_ومين قالك إنه هيكون مش كده
ومين قالك إنتي إنه هيكون كده!
_أنا بقول تجربي.
إنتي مالك قلبتي على أمي أوي كده.
_فرق الأجيال بقى يابنتي.
برغم إن اللي بينا يدوب عشر سنين بس كانوا فرق كويس كنت بحسها حاجات كتير كوتش وفي نفس الوقت صديقة وفي نفس الوقت فيها روح الأمومة كانت حاجات كتير الصراحة..
مع إصرار الكل وافقت أقعد معاه كانت لحظة مش سهلة كنت حاسة إن مكسوفة أدخل إزاى هقعد مع راجل غريب لا لا أنا عيلة صغيرة بس مقدرتش دخلت وحاولت أجمع كل شجاعتي.
_عاجبك الشراب لو عاجبك والله أقلعهولك خديه
_طب إيه أنا جاي حفلة تقييم الشراب ولا ايه
إتفضل قول اللي عاوزه.
_ وهقول إزاى وإنتي باصة للشراب ممكن تبصيلي والله عادي على فكرة أنا مش وحش أوي كده.
إحمد ربنا إن قاعدة معاك.
_يعني معتبصليش
لا مش هبص وقول بقى الكلمتين اللي عندك أحسن والله أقوم وأسيبك.
_واضح إن خلقك ضيق أوي.
جدا وبتعصب بسرعة كمان.
_ما شاء الله على طول كده أول معلومة عنك طب فين تجميل البدايات.
أخدعك يعني يرضيك تتجوز واحدة خدعتك
_لأ أقنعتيني الصراحة طب بصي سيبنا من العصبية خالص إيه رأيك في فكرة الجواز
ناس هبلة أكون في بيت أهلي معززة مكرمة أروح لواحد أشيل مسئوليته هو وعياله هو أنا عارفة أشيل مسئولية نفسي!
_طب بصي خلاص بلاش فكرة الجواز إيه رأيك في فكرة الخطوبة
تضيبع وقت أكتر كان ممكن ناخدلنا كام كورس في الوقت اللي هنتكلم فيه ده.
_إحم طب أقوم طيب وراكي حاجة في الساعة دي معطلك عنها
والله كان ورايا كورس بس ماما بقى كنت بقنعها نخلي المقابلة بعد الكورس بس بيخلص ١١ ف كلك نظر بقى.
_ إحم كلي نظر إيه أقوم أمشي طيب
لا يا عم أنا مش قليلة الذوق للدرجادي ممكن تنجز وتقول الكلمتين اللي عندك.
_على فكرة لو واحد غيري كان قام ومشي وحس إنك بتطرديه!
حس!
_بتقولي حاجة
لا لا كمل.
_بس أنا مش همشي وقاعد عايز أسمعك إنتي ليه بتحاولي تطفشيني يا رهف!
أقولك الصراحة بما إن الكلام بقى على المكشوف
_ياريت أنا عاوز نبدأ بالصراحة.
خاېفة خاېفة من الخطوة وخاېفة منكونش قدها خاېفة أختار غلط خاېفة أختار حد يضيعلي اللي قعدت أعمل فيه.
_طب ليه حكمتي عليا