خرافة الليل
بيك... لكن حسابهم معايا كان مازال يقعدوا عندي دقيقة !!! قالها يام حرام عليك اما دسايس هاذم ليهم عمر عندنا كيفاش اطرديهم !!! قالتله هاذم مش بعيد زلبحتهم ام البنية والا البنية بيدها!!! قداش الناس طماعة ياولدي اسمع كلامي انا برك!!! اسكت الصادق وقال في خاطره مش باش نتكلم لين نتاكد من حاجة !!! ومن الصباح القوا الخديمات الصادق راكب قبلهم للكروسة !!! ضحكوا وقالوله صبحك الله بالخير يا سيدي !!! باش توصلنا حتى اليوم !!! صبح عليهم وقالهم انا نحب نعرف حاجة وحدة وبعدها ايصير كان الخير ..لكن سالتكم بالله اتجوبوني بالحق !!! خافوا الخديمات وقالوله والله يا سيدي ما نقولوا غير الحق !!! قالهم قبل كل شي البنية والا امها راسمين معاكم خطة !!! طوووول حلفوا مع بعضهم وعرفوا انو الصادق كلم امه في الموضوع !!! قالوله وحق لا اله الا الله لا البنية ولا امها عندهم علم ولا يد فيها !!! تبسم الصادق وقال الحمدلله !!! قالهم امالا توا واحنا في الطريق احكولي علاش عملتو هكا!!! الكروسة ماشية بين طوابي الهندي الاخضر الطري على الجنبين تكلمت وحدة من الخديمات وقالت ياسيدي للاتنا طول عمرها اتقول نحب مرا قمر ضاوي لوليدي الصادق !!! صحيح تحبها بنت حسب ونسب لكن كي شفنا هالبنية قلنا هاذي مافماش كيفها !!! وامشينا جري لللاتنا وقلنالها القينا لقمر الضاوي اللي تحبيها لسيدنا الصادق !!! وكي عرفت اللي هي بنت لمرا اللي اتقطر في الورد ڠضبت علينا وقالت لا !!! لكن احنا قلنا شي ...هالقمر هاذي ماتضوي الا دار سيدنا الصادق !!! وقعدنا انفكروا كيفاش انخلوك اتشوفها وتحكم بروحك !!! وتوا نحبوك يا سيدي اتفكر معانا كيفاش انخلوا للاتنا اتشوفها لانو كان شافتها وشافت زينها توافق عليها طوووول !!! قعد الصادق طول الطريق ساكت وكي وصلوا لدار لمرا وهبطو شكاير الورد حطوهم وطلعوا !!! قالهم الصادق انا موافق على البنية وتونفكر معاكم كيفاش انخلوا امي اتشوفها وبعدين ايصير خير !!!!
