قصه وعبره

روحت لريم ملقتهاش هي كمان!!
نزلت على السلم وانا بنادي عليهم بس اتضح ان مافيش حد في البيت غيري!!
خرجت ركبت عربيتي وفضلت ادور عليهم اتصلت بنرمين موبايلها مقفول لحد ما بعد ربع ساعة لقيتها هي بتتصل بيا بس من رقم تاني لما رديت سمعتها بتقولي پذعر 
_ الحق ريم يا ياسر ريم بتروح مننا 
كنت ماشي بالعربية فرملت فجأة وانا بقولها 
انتوا فين يا نرمين وايه اللي حصل 
مكنتش قادر اتلم على اعصابي قالتلي على عنوان المستشفى ولما روحت لقيتها قاعدة على كرسي جنب ريم اللي نايمة على سرير ومتعلقلها محاليل وعلى بوئها وأنفها جهاز اكسجين!!
وفيه دكتور واقف بيبص على جهاز نبضات القلب لما شافني وعرف اني ابوها قالي بتهجم 
_ ازاي يا استاذ تسيب بنتك في حالة خطړ زي دي انا ممكن ابلغ عنكم نتيجة للإهمال 
قولتله وانا ببلع ريقي 
مالها يا دكتور بنتي مالها طمني عليها
قالي بنفس النبرة 
_ يا سلام جاي تطمن عليها دلوقتي احمد ربنا ان امها جابتها في الوقت المناسب لو كانت اتأخرت البنت كانت ھتموت لو سمحت عديني
وخرج وهو متنرفز وانا الصدمة اثرت عليا لدرجة خليتني مش مستوعب اللي سمعته وفضلت واقف باصص على ريم اللي مغمضة عنيها وبتاخد نفسها بالعافية!!
مسكتني نرمين من ايدي وقالتلي وهي بتجز على اسنانها 
شوفت اخرة بخلك وصلتنا لفين البنت عندها التهاب حاد في الشعب الهوائية وده أثر على صدرها وجسمها كله ربنا يستر وتعدي على خير انا مش عارفه انت ازاي اب كدا 
مكنتش عارف ولا قادر ارد بأي كلام انا كنت باصص على بنتي والخراطيم متعلقة في ايديها وهي مغمضة عنيها ومش حاسة بأي حاجة لما حسيت اني هبدأ انهار طلعت برة الاوضة ومشيت لعربيتي وقعدت فيها وبدأت ابكي
بعد دقايق مشيت بالعربية
مش عارف رايح فين عايز ابعد وخلاص انا عارف اني مقصر كأب ولان شخصيتي ضعيفة ومعترف بده مش بواجه اي مشكلة بتقابلني بحاول بأي طريقة ابعد نفسي عنها
وانا سايق وسرحان ڠصب عني خبطت في ميكروباص جنبي حصلت مشكلة كبيرة ونزل سواق الميكروباص فضل يتكلم بصوت عالي ويزعق والناس اتلمت وفي وسط كل ده انا في عالم تاني كنت ساكت وباصص عليهم وفي النهاية حطيت ايدي في جيبي واديته فلوس لقيته سكت وركب الميكروباص ومشي
الخبطة عربيتي هي اللي اټأذت فيها اكتر ركبت عربيتي وروحت نمت ايوة انا معترف وهفضل اقولها انا في الفترة دي مكنتش عايز اواجه اي متاعب كنت انا سببها لا سألت على بنتي ولا اتصلت بمراتي علشان اطمن عليها وكأن بعدي عنهم هيقوم ريم بالسلامة!
تاني يوم قررت اروح بالعربية الحرفيين عند سمكري علشان يرد الجزء اللي اتخبط من عربيتي بص السمكري على الخبطة وقالي 
_ هتتكلف ٦ آلاف جنية ان شاء الله هتسيب جزء دلوقتي وبعد ما تتصلح الجزء التاني
قولتله 
هاخدها امتى
قالي 
_ اسبوع بالكتير يا باشا وهتلاقيها زي الاول واحسن
كان واقف قدامي بالعافية واضح عليه التعب والسواد كان باين تحت عينه وكأنه مانمش من ايام ده غير السجاير اللي كان بيشربها بشراهة وبكثرة استغربت منها تخلص واحدة يولع التاني وراها علطول وكان طبيعي يفضل يكح كتير
سيبتله جزء من الفلوس ومشيت وروحت المستشفى مواصلات في الطريق قعدت
مع نفسي وفكرت واكتشفت موضوع مكنش في بالي حسسني اني صغير قدام نفسي اوي اكتشفت ان اي حاجة تخصني ادفع فيها علطول لكن في البيت او حاجة لمراتي او بنتي الجنية بيخرج مني بالعافية!!
صدقوني انا اكتشفت ده متأخر